سەرۆک جاشێکی دیکە مرد

ەمڕۆ بەیانی کاتژمێر(٩) سەرۆک جاش خدر ڕەشە بەحری مرد..

خدر ڕەشید بەحری، ناسراو بە خدر ڕەشە بەحری، سەرۆک جاشی فەوخی ژمارە (١٧٣) بووە، بەخۆی و سەددان جاشییەوە بەشداری ئەنفالی ( یەک و دوو )یان کردووە و دووجاریش لەپاداشتی چەلاک بوونی خۆی و فەوجەکەی لە پڕۆسەکانی ئەنفالدا، مەدالیای ئازایەتی لەلایەن خودی سەددام حسێنەوە پێ دراوە و جارێکیش مەدالیای ئازایەتی سەرۆکایەتی کۆماری پێ دراوە.

خدر ڕەشە بەحری یەکێک بووە لەسەرۆکجاشە خیانەتکار و بەعسیەکانی ناو کورد.

هاوکات لەگەڵ ئەوەشدا ناوی لەلیستی دادگای باڵای تاوانەکانی عێراقدا لەڕیزبەندی ژمارە (١٧٩)دا هاتووە بۆ دادگایی کردن، بەڵام ئەویش وەک ئەوانی دیکە، لەلایەن پارتی و یەکێتییەوە ڕێگری کرا لەدادگایی کردنیان.

خدر ڕەشە بەحری لەپاش ڕاپەڕینەوە چوونە ناو پارتی دیموکراتی کوردستان و هەر لەو حیزبەدا بەپلەی بەرز وەک پێشمەرگەی دێرین خانەنشینی بۆ بڕایەوە، هەر لەلایەن پارتییەوە کوڕ و نەوەکانی بەپلەی جیاجیا و بەرز دامەزرێنران، دوو لەکوڕەکانیشی بەپلەی بەرز لەناو پێشمەرگەدان، کە ئەمانەن( عەقید حەمە ڕەشید و رائید موسا)، لەگەڵ کوڕێکی دیکەیدا بەناوی «ئیبراھیم» کە لەفەرمانگەی پەیوەندییەکانی دەرەوە کار دەکات، ئەمە لەکاتێکدایە خدر ڕەشە بەحری دەستی سورە بەخوێنی سەددان پێشمەرگە و ژن و پیاو و منداڵ و پیری کورد..

‍